तेलहा पोखरीमा पहिलो पटक छैठ पर्व सुरु

राष्ट्रिय आवाज

जनकपुरधाम, कार्तिक ११ गते

जनकपुरधाम उपमहानगरपालिकामा कार्यरत भेटेरिनरी डाक्टर अमर कुमार साह र मल्लिक ग्रुपका युवाहरूको निरन्तर निःशुल्क सरसफाईका कारण अहिले ऐतिहासिक तेलहा पोखरी पुनः सुन्दर रूपमा फर्किएको छ। यही पुनर्जीवित पोखरीमा यस वर्ष पहिलो पटक श्रद्धा र आस्थाको महान पर्व प्राकृतिक पूजा छैठ सुरु गरिएको हो।

पशु चिकित्सक डा.अमर कुमार साहको अगुवाइमा सुरु गरिएको यस छैठ पूजा धार्मिक आयोजनाले स्थानीयवासीमा उत्साह र धार्मिक समर्पणको नयाँ ऊर्जा भरेको छ। मल्लिक ग्रुपका युवाहरूले पोखरीको सरसफाइ, सजावट र व्रतालुहरूको सहजताका लागि विशेष व्यवस्थासमेत गरेका छन्।

पशु चिकित्सक अमर साहले भने, “तेलहा पोखरी हाम्रो पुरानो ऐतिहासिक सम्पदा हो। यसलाई स्वच्छ र जीवित राख्दै यहाँ पहिलो पटक छैठ पूजाको सुरुवात गर्नु हाम्रो सबैको गर्वको विषय हो।”

मल्लिक ग्रुपका अगुवा सरोज मल्लिकले भने, “हामी निरन्तर सरसफाइ र संरक्षण अभियानमा छौँ। धार्मिक पर्वसँगै जनचेतनाको सन्देश फैलाउने हाम्रो प्रयास पनि यही हो।”

स्थानीय बासिन्दाहरूले यस पहललाई स्वागत गर्दै पोखरीको सौन्दर्य र धार्मिक महत्त्व जोगाउन निरन्तर सहयोग गर्ने प्रतिबद्धता जनाएका छन्।