जनकपुरधाममा दशैँ बजार व्यवस्थापन सम्बन्धी छलफल सम्पन्न

मोनु गुप्ता 

जनकपुरधाम, भदौ १८ गते 

जनकपुरधाम उद्योग वाणिज्य संघको आयोजनामा आगामी दशैँ–तिहार पर्वलाई लक्षित गर्दै बजार व्यवस्थापन सम्बन्धी विशेष छलफल कार्यक्रम आज बुधबार बिहान सम्पन्न भएको छ ।

संघको सभाहलमा सम्पन्न उक्त कार्यक्रममा अध्यक्ष श्री सुरेन्द्र भण्डारीको अध्यक्षतामा भएको कार्यक्रममा विभिन्न व्यापारी, सरोकारवाला निकायका प्रतिनिधि, पत्रकार तथा संघका पदाधिकारीहरुको उपस्थिति रहेको थियो ।

कार्यक्रमलाई सम्बोधन गर्दै अध्यक्ष भण्डारीले नेपालीहरुको महत्त्वपूर्ण चाडपर्वको समयमा बजारमा अत्यधिक भीडभाड हुने भएकाले मूल्य नियन्त्रण, कालोबजारी रोकथाम, गुणस्तरिय आवश्यक उपभोग्य वस्तुको सहज आपूर्ति र उपभोक्ताको अधिकार संरक्षण संघको प्राथमिकता हुने स्पष्ट पार्नुभयो । उहाँले भन्नुभयो दशैँ–तिहारको समयमा उपभोक्तालाई सहज मूल्यमा आवश्यक वस्तु उपलब्ध गराउनु उद्योग वाणिज्य संघको दायित्व हो । व्यापारी समुदाय र प्रशासन बीच सहकार्य भएमा उपभोक्ता थप सन्तुष्ट हुनेछन् ।

छलफलमा सरोकारवाला पक्षहरुले बजार व्यवस्थापन, सुरक्षाको व्यवस्था, आवश्यक वस्तुको मूल्य सूची सार्वजनिक गर्ने र अनुगमनलाई प्रभावकारी बनाउन सुझावसमेत दिएका थिए ।