नेकपा (एकीकृत समाजवादी) धनुषाको सातौँ जिल्ला अधिवेशन सुरु — अध्यक्ष माधव नेपालले जनताको पक्षमा उभिन नेताहरुलाई आग्रह

 ओपी साह 

जनकपुरधाम, असार १७ गते 

नेपाल कम्युनिस्ट पार्टी (एकीकृत समाजवादी) धनुषा जिल्ला कमिटीको सातौँ जिल्ला अधिवेशन मंगलबार जनकपुरधाम स्थित महेन्द्र नारायण निधि मिथिला भवनमा एक विशेष समारोहबीच सुरु भएको छ। अधिवेशनको उद्घाटन पार्टीका अध्यक्ष तथा पूर्वप्रधानमन्त्री माधव कुमार नेपालले गर्नुभयो।

* राजनीतिमा विचलन, तर व्यवस्थामा जनसमर्थन कायम

 उद्घाटन समारोहमा सम्बोधन गर्दै अध्यक्ष नेपालले पछिल्लो समय देशको राजनीति दिशाहीन बन्दै गएको धारणा राख्नुभयो। उहाँले वैचारिक दरिद्रता, प्रतिक्रियावादी सोच, र पुँजीवादी प्रभावले गर्दा कम्युनिस्ट आन्दोलन कमजोर बन्दै गएको बताउँदै यसको सशक्त प्रतिवाद गर्न आवश्यक रहेको उल्लेख गर्नुभयो।

"राजनीतिमा विचलन, भ्रष्टाचार, अवसरवाद र सिद्धान्तहीनता मौलाउँदै जाँदा जनतामा आक्रोश र निराशा पैदा भएको छ। तर, वर्तमान लोकतान्त्रिक व्यवस्थाप्रति जनताको समर्थन अझै पनि बलियो छ," अध्यक्ष नेपालले भन्नुभयो।

 * “सत्यको अन्ततः विजय हुन्छ” – पतञ्जलि जग्गा प्रकरणमा स्पष्टोक्ति

 हालैका दिनमा चर्चामा रहेको पतञ्जलि जग्गा प्रकरणमा आफ्नो नाम जोडिन खोजिएको प्रति प्रतिक्रिया दिँदै अध्यक्ष नेपालले आफू त्यसमा कुनै पनि हिसाबले संलग्न नरहेको प्रस्ट पार्नुभयो।

"मैले कहिल्यै गलत कामको समर्थन गरेको छैन। नबिराउनु, नडराउनु मेरो जीवनको मूल्य हो। सत्यको अन्ततः विजय हुन्छ भन्ने कुरामा म दृढ विश्वास गर्छु," अध्यक्ष नेपालको भनाइ थियो।

 * जनताको पक्षमा स्पष्ट लाइन लिन नेताहरूलाई आह्वान

कार्यकर्तालाई जनताको पक्षमा दृढताका साथ उभिन आग्रह गर्दै अध्यक्ष नेपालले विचार र सिद्धान्तको बलमा मात्रै कम्युनिस्ट आन्दोलनको पुनरुत्थान सम्भव हुने बताउनुभयो।

 "पार्टी एकताबद्ध भएर अघि बढ्नुपर्छ। सिद्धान्त, निष्ठा र जनताप्रतिको प्रतिबद्धता नै हाम्रो बल हो। नेतृत्वलाई जनविश्वास कायम गर्न व्यवहारमा देखिने परिवर्तन जरुरी छ," उहाँले भन्नुभयो।

* कार्यक्रममा उल्लेखनीय उपस्थिति

 उद्घाटन समारोहमा पार्टीका केन्द्र, प्रदेश र स्थानीय तहका नेताहरूको उल्लेखनीय उपस्थिति थियो। विशिष्ट अतिथिहरू, पर्यवेक्षक तथा विभिन्न जिल्लाबाट आएका हजारौ प्रतिनिधिहरूको सहभागिता रहेको थियो।

 धनुषा जिल्ला कमिटीका अध्यक्ष तथा कार्यक्रम आयोजकले जिल्लामा संगठन सुदृढ पार्न तथा आगामी राजनीतिक गतिविधिहरूलाई प्रभावकारी रूपमा अघि बढाउने योजना बारे समेत स्थानिय नेता जिल्ला सचिव राज कुमार यादवले जानकारी दिनुभयो।

कार्यक्रम सांस्कृतिक प्रस्तुतिहरू, शुभकामना मन्तव्यहरू र पार्टीको राजनीतिक प्रस्तावमाथिको प्रारम्भिक छलफलसँगै उदघाटन सत्र समापन भएको हो भने आज राती ९ बजे पछि निधि भवनमा बन्दसत्र हुने छ भने भोलि जिल्ला कमिटी विस्तार हुने छन।