ऐतिहासिक तिरहुतिया गाछीमा वृक्षारोपण

मोनु गुप्ता,राष्ट्रिय आवाज

जनकपुरधाम, असार ४ गते 

धार्मिक, सांस्कृतिक तथा पर्यटकीय नगरी जनकपुरधाम स्थित ऐतिहासिक तिरहुतिया गाछीमा वृक्षारोपण गरिएको छ। जनकपुरधाम उपमहानगरपालिकाको अगुवाइमा ६२५ वटा विभिन्न जातका विरुवा रोपिएको हो।

रामायणकालीन इतिहास बोकेको यस तिरहितिया गाछीमा गाछीको कमी देखिएको भन्दै पर्यावरण संरक्षण तथा संवर्द्धनका लागि यो अभियान सुरु गरिएको नगरप्रमुख मनोजकुमार साहले जानकारी दिए। उनका अनुसार पिपल, बर, आँप, जामुन र पाखर जस्ता छायादार तथा फलदायक विरुवा रोपिएको छ।

“मेला, सभा, धार्मिक कार्यक्रम वा विश्राम गर्न आउने नागरिकलाई छायाँ प्रदान गर्ने उद्देश्यले वृक्षारोपण गरिएको हो,” मेयर साहले राष्ट्रिय आवाज सँग भने, “रामायणकालीन गाथालाई वर्तमान पुस्तासँग जोड्दै, पुरानो गाछीको स्वरूप फर्काउने प्रयास हो।”

उक्त क्षेत्रलाई बिहानको मर्निङ वाक, योग तथा खेलकुदको उपयुक्त स्थलका रूपमा विकास गर्ने लक्ष्य रहेको साहको भनाइ छ। उनले आगामी दिनमा जनकपुरधाम भर थप हजार विरुवा रोप्ने योजना रहेको र ‘हरित जनकपुर, सुन्दर जनकपुरधाम’ बनाउने लक्ष्यका साथ अभियान अघि बढाइने बताए।