खुलेआम अवैध रूपमा नदीजन्य सामग्री उत्खनन सम्बन्धीत निकाय मौन

धिरेश दत्त

जनकपुरधाम, बैशाख १८ गते बिहिबार।

धनुषाको मिथिला नगरपालिका–५ स्थित औरहीबाबा सामुदायिक वन क्षेत्रबाट दिउँसोकै समयमा खुलेआम अवैध रूपमा नदीजन्य सामग्री उत्खनन गरिएको पाईएकोछ । 

वन कर्मचारीको गस्ती टोलीले वन क्षेत्रमा अवैध उत्खनन गरिरहेको अवस्थामा ट्याक्टरसहित उत्खननमा संलग्न व्यक्तिहरूलाई पक्राउ गरिएपनि बिहानको समयमा समेत नदीजन्य सामग्री उत्खनन रोकिएको छैन ।

डिभिजन वन कार्यालयका प्रमुख विनोद सिंहले सव डिभिजन वन कार्यालय पुष्पवलपुर र जिल्लाबाट खटिएको संयुक्त गस्ती टोलीले ज १ त ६३७७, ज १ त ४८५६ र मधेश प्रदेश ०२–००१ त–२८७७ नम्बरका ट्याक्टर नियन्त्रणमा लिएको जानकारी दिनुभयो ।

साथै उहाँले मिथिला नगरपालिका–५, विश्रामपुरका सामैल अछामी, समिर भुजेल र सुन्दरकुमार महरालाई पनि नियन्त्रणमा दिएको बताउनुभयो ।

सिंहले अवैध उत्खनन आरोपमा पक्राउ परेका मानिस तथा प्रयोग भएका सवारीसाधनमाथि आवश्यक थप अनुसन्धान गरी वन ऐन अनुसार कारबाही प्रक्रिया अगाडि बढाउने जानकारी दिनुभयो ।

पछिल्लो समय धनुषाको विभिन्न सामुदायिक वन क्षेत्रमा रातिको समयमा अवैध ढङ्गले बालुवा, माटो र अन्य सामग्री उत्खनन हुने क्रम बढेपनि अहिले दिउँसोकै समयमा अबैध उत्खनन भईरहेको पाईएको छ । यस्ता क्रियाकलापले वन क्षेत्रको जैविक विविधता र पर्यावरणमा गम्भीर असर पार्ने भएकाले सरोकारवाला तथा स्थानीयले रोकथामको माग गर्दै आए पनि सम्बन्धित निकाय मौन देखिएकोछ भने प्रहरी प्रशासन समेत मुकदर्शक भएकाछन् ।